طب ايه اللى انت جاى تقول عليه,,,,,,,,,

اولا مبروووووووووووووك على النقلة الجامدة دى من الثانوى للجامعة

اما بقى لو حد فى عينه نظرة تفاؤل ينسى

الموضوع كبيييييييييييييييييييير قوووووووووووووووووووى

بس هنحاول نساعدكو وربنا يوفقكوا يارب

أول حاجة لازم كلنا نعرف حاجات مهمة جدا

نظام المذاكرة
نظام المذاكرة في الكلية يختلف عن نظام المذاكرة في ثانوي
وكل طالب محتاج يعمل نقلة ما بين انظامين
في الكلية مينفعش تحفظ الموضوع كلمة كلمة
في الكلية لازم تفهم كويس قبل ما تحفظ علشان تحفظ كويس
في الكلية يستحسن تسمع الكلام ولو مرة قبل ما تذاكرة علشان بيفرق جامد في المذاكرة
في الكلية برضو يستحسن انك تقرى الكلام ولو مرة يوم المحاضرة قبل متذاكرة للامتحان لانه بيفرق في التذكر
في الكلية محدش هيقولك تذاكر ايه ومتزاكرش ايه انتا هتعرف وحدك لما تفتح المادة اكتر من مرة وتعرف الحاجات المهمة من الدروس والمحاضرات
حل الامتحانات وكتب الاسئلة بيفرق كتير بين طالب وطالب .. الحل الكتير هيساعدك في الامتحان ويمرنك ويخليك تجيب درجات اعلى علشان كده ملزمة الامتحانات مهمة جدا

--------------------------------------------------------------------------------
مشاكل الترجمة
اول مشكلة بتقابل طالب سنة اولي هي الترجمة واللغة المعظم بيكون مش داخل في مود الكلية خالص ولا عارف يتابع الكلام مع الدكاترة في المحاضرات وحوارات من دي الموضوع من الاخر محتاج شوية وقت وحبة ذكاء في المذاكرة يعني ايه ذكاء في المذاكرة يعني انتى مش فاهمة الكلام اللي مكتوب بالانجليزي واللاتيني ما تنشفيش دماغك بقى وتقول الله مش سايبة كلمة الا لما اترجمها وتقعدى سايبة الدنيا وفاتحة القاموس وبتشوفى كلمة كلمة لا كدة مش هاتنجزى وغالبا هاتقعدى تذاكرى اليوم كله في صفحة واحدة وكمان انتى مش محتاجة المعنى الحرفي انتى محتاجة تفهمى الموضوع انت تكبرى دماغك شوية ترجمى حبة كلام وسيب الباقى والمهم حاولى تمشي في المنهج يعني تقرى في الكتاب او الملزمة اللي هتذاكرى منها وتمشي حبة صفح فيها علشان في سنة اولي غالبا الفصل الاول بيكون كله كلام بيتقال تاني بقية المنهج وبتفهم بعد كدة مع الشرح يعني في حاجات مش هاتعرفى تفهميها غير لما توصلى لنهاية الChapter وهكذا يبقى تترجم الكملام المهم وتطنشى للباقي وهو هايتفهم بعد كدة من السياق حولى تركزى شوية في الكلام بتاع المحاضرة او السيكشن وحاولى تلقطى منه اي حاجة معلش الموضوع بيبقى صعب في الاول بس علشان التعود ومتقلقيش المحاضرات مش كلها إنجليزى زى ما انتى فاكرة بالعكس معظم الدكاترة بيتكلموا عربى عادى والانجليزى بس للمصطلحات الطبية

--------------------------------------------------------------------------------
مصادر المذاكرة:
طيب تاني مشكلة بتقابل سنة اولى هي مصدر المذاكرة والواحد فاكر والله انه كان بتضحك عليه بشكل في سنة اولى وكان بيجيب للمادة الواحدة يجي 3 او 4 كتب غير طبعا الورق والملخصات والكلام ده بصراحة ماينفعش خالص من الاخر اختار مصدر واحد شوف فيه حبة شروط مهمة

1.يكون مبسط كدة ولغته سهلة ( بلاش كلكعة والنبي وماتعمليش فيها رامبو لحسن تشربى في اخر السنة)
2.يكون مشروح على هيئة نقط ( يعني مش سايح كدة على بعضه ما تعرفيش تجيبى راس الموضوع من رجليه)
3.يكون قصير ومختصر وفي نفس الوقت مغطي النقط الاساسية (وانا عارفة اللي بتفكروا فيه قصير ايه وبعدين يجي الامتحان من براه لا يا جماعة ما تقلقوش الامتحان بيجي غالبا من الحاجات البيزك مش بيدورو على الحاجات الرفيعة المتطرفة والمنهج طويل وحدة لو انت ذاكرت من مصدر طويل عمرك ما هتخلص المنهج حتى قراية يعني تذاكر فرعين بس في المادة 100% وتسيب الباقي ولا تذاكر كل فروع المادة 80% بالعقل كدة احسبها)
4.اوعي اوعي اوعي - 3 اوعى - تجيبى مصدرين لنفس المادة وتقعد تذاكر في كل واحد شوية او تيجي في نص السنة كدة وتقولى انا هاغيرة مصدري للمذاكرة وتيجي تهد من الاول وتبدأى تذاكرى الكلام تاني بس من المصدر الجديد لا لا لا
وبلاش تقعدوا تيجيبوا كل شوية ورق ورق ورق علشان بيلخبطكوا جدا جدا جدا وبتقعدوا كدة قدام الورق تقولوه اكلك منين يا بطة وكمان في الاخر بيتنصب عليكوا والورق بعد كدة بيترمي

1.احسن مصدر مذاكرة هو المصدر العام .. يعني لو في كتاب قسم الدفعة كلها والقسم ملتزم بيه ده بيبقى حلو جدا ومناسب

» ادخلوا شوفوا اللى يزعل مراته اخرته ايه ؟
» معجزات الحبيب محمد صلى اله عليه وسلم